الى امنا الحبيبه بغداد

. . إلى أمنا بغداد الجريحة .. شعر شعبي ..

الى أمنا بغداد الجريحة
هِيَّ غيمهْ وسودهْ لازم تِنجِلي
ويِغسل جْروحچ مطرْ بلسَم شِفهْ
ويرجع لْحضنچ زمان الليْ نگضهْ
طفل يرضعْ من لبن صدرچ وفهْ
سلام الله عْليچ ياديرة أهلنه
وْياحضاره وْياشَهامه وْمعرفهْ
وْياسَعَفْ داعَبِ الشمسِ مْن الزغرْ
وامتِلهْ من الريح حنِّيه وْدِفهْ
وَلَوْ زعلانه على اطفالچ ِاليوم
هاذي بس هبَّة هَوَه مو عاصِفهْ
إنتِ أُمهم خَبِّئيهم بالضلوع
إشِّفنه منِّچ غير نبلْ وْعاطفهْ
شنو أكبر ياحْنَينه مْن ِالحنين
الچان طبعچ بالايامِ السالِفهْ
إنتِ من رَحمچ وِلَدْ دجله وْفرات
كَحلَوْ عيون الأرامل والاطفال
ورُوَه ورد الدفله وانطوله طعُمْ
وفََجْرَو السنبل بمَي لونه زلال
وْصاغَن القطره البچيناهه نبض
إحنه منّ عيونَّه تشمخ جِبال
الدمع ياأُمنه طهاره بهالزمن
خَل يربّينه ولو إحنه رِِجال
ومو غريبه وْعيب من يبچي الرجل
إلغريبه مايِفهمونه الانذال
نبتِسِم واحنه بألمنه مكتِِّفين
ومانحب رحمه ونعف عنِّ السؤال
نبقه ننزف كَرَم وانسام وعشك
وْجَرْحِنه نْضَمْدَه وإن طال المَطال

» صور من بغداد
» حب بغداد
» سوق الهرج في بغداد
» الى حبيبتي بغداد
» عزيزة بغداد